لما شوفير السرفيس يبيع مخصصاته من المازوت ويقلك أحسن من الشغل ويترك الناس ناطرين بالشوارع فرج رب العالمين
ولما صاحب البيت يستغل حاجة المستأجر ويزيد الآجار لانو في ناس بتدفع أكثر
ولما الصيدلي يخبي الدوا المفقود ويبيعو بالسعر المزاجي وبيقلي مقطوع
ولما بياع الخضرة والتاجر والسمان يكونوا متفقين ع سعر واحد يحددوه بمزاجن وعلى هوى السوق لا حسيب او رقيب
ولما الدكتور يسعر كشفيته بالــ دولار من دون التمييز بين فقير وغني
ولما موزع الخبز يتصرف بالمخصصات على كيفه ولما الفران بينقص الوزن حتى يستفيد على حساب الناس
ولما صاحب الكازية يسرق من مخصصات الناس ويتلاعب بالعداد
ولما بياع الغاز وسائق التاكسي ومصلح الادوات الكهربائية والبلاط والطيان والدهان والمكانيكي واستاذ المدرسة والمحامي والشحاد وغيرو وغيرو وغيروووو...
و لما المسؤول يلي لازم يراقب ويحاسب كل هؤلاء يكون شريك معهم وحصتو محفوظة
ولما بدك تحكي عن هؤلاء كل الناس بتقلك مع حق الله لا يسامحن والله يكون معنا ويرحمنا...
هون ماعاد عدونا خارجي.. وحصار فقط
هون اللوم علينا نحن..
إذا نحنا ما عم نرحم بعضنا... كيف عم نطلب من الله يرحمنا
ملاحظة في بعض من هؤلاء مايزال عندن شوية ضمير...
نديم معلا
